Koofur Galbeed oo sheegtay in ay joojisay wadashaqeynta RW Rooble ee arrimaha Doorashooyinka

War qoraal ah oo ka soo baxay maamulka Koofur Galbeed ayaa lagu sheegay in go’aanka uu Ra’iisul Wasaare Rooble ku baddelay xubno ka tirsan Guddiga Doorashooyinka FEIT, yahay mid sharci darro ah oo baal marsan go’aannadii iyo heshiisyadii Madasha Wadatashiga Qaranka.

Koofur Galbeed ayaa qoraalkeeda ku sheegtay in ay joojisay wadashaqeyntii kala dhaxaysay Ra’iisul Wasaaraha Soomaaliya Maxamed Xuseen Rooble ee arrimaha doorashooyinka, waxayna tilmaantay in ay qaadayso tallaabo kasta oo ay ku ilaalinayso sharciga iyo nidaamka Federaalka

Bayaanka maamulka Koofur Galbeed ayaa sidoo kale waxaa ay Ra’iisul Wasaare Rooble ku eedeeyeen in uu si sharci darro ah oo dano siyaasadeed ay ku jiraan uu u hor istaagay kuraas habraac sax lagu doortay iyo in uu faragelinta ku hayay doorashadii Koonfur Galbeed.

Qoraalka ayaa u qornaa sidan

Dowlad Koonfur Galbeed waxay caddeynaysaa in go’aanka kasoo baxay Ra’iisul Wasaaraha uu yahay mid sharci darro ah oo baal marsan go’aannadii iyo heshiisyadii wadar-ogolka ahaa ee ay dajisay Madasha Wadatashiga Qaranka.

Dowladda Koofur Galbeed marnaba ma aqbali doonto damaca shakhsiga ah ee Ra’iisul Wasaare Rooble oo muddooyinkii u dambeeyay xadgudub joogta ah ku hayay madax bannaanida Guddiyada Doorashooyinka.

Dowladda Koonfur Galbeed waxay si dhaw ula socotay in Ra’iisul Wasaaraha uu si sharci darro ah oo dano siyaasadeed ay ku jiraan uu u hor istaagay kuraas habraac sax lagu doortay, wuxuuna ka dhaga adaygay inuu joojiyo faragelinta qaawan ee uu ku hayay doorashooyinka Koonfur Galbeed.

Dowladda Koonfur Galbeed waxay shacabka Soomaaliyeed iyo Beesha Caalamka la wadaagaysaa in laga bilaabo xilliga ay warqaddan soo baxday ay joojisay wadashaqeyntii kala dhaxaysay Ra’iisul Wasaare Maxamed Xuseen Rooble ee arrimaha taabbo-gelinta doorashooyinka, uuna lumiyay kalsoonidii hoggaaminta doorashada dalka oo haatan u baahan in laga samatabixiyo.

Dowladda Koonfur Galbeed waxay qaadaysaa tallaabo kasta oo ay ku ilaalinayso sarreynta sharciga iyo nidaamka Federaalka ah ee ay Soomaali ku heshiisay, waxayna cod dheer ku sheegaysaa in carqalad kasta oo doorashada ku timaado uu masuul ka yahay Ra’iisul Wasaare Maxamed Xuseen Rooble.

You might also like More from author